Ali Məhkəmənin hakimi Şahin Yusifov təqaüdə yola salınıb

Azərbaycan Ali Məhkəməsinin Cinayət Kollegiyasının hakimi Şahin Yusifov avqustun 5-də təqaüdə yola salınıb. Bu barədə Ali Məhkəmədən məlumat verilib.

Bildirilib ki, bununla əlaqədar keçirilən tədbirdə Ali Məhkəmənin və Məhkəmə-Hüquq Şurasının sədri İnam Kərimov çıxış edərək Şahin Yusifovun uzunillik fəaliyyətini yüksək qiymətləndirib.

Qeyd olunub ki, Şahin Yusifov uzun illər məhkəmə-hüquq sistemində müxtəlif məsul vəzifələrdə çalışıb. O, 2007-ci ildən Ali Məhkəmənin hakimi, 2010–2020-ci illərdə isə Ali Məhkəmənin Cinayət Kollegiyasının sədri vəzifəsində fəaliyyət göstərib.

İnam Kərimov vurğulayıb ki, Şahin Yusifov peşəkar hakim kimi məhkəmə sisteminin inkişafına, ədalət mühakiməsinin səmərəliliyinin artırılmasına və qanunun aliliyinin təmin edilməsinə mühüm töhfələr verib.

Tədbirdə bildirilib ki, onun fəaliyyəti dövlət tərəfindən yüksək qiymətləndirilib və Prezident İlham Əliyevin sərəncamları ilə "Tərəqqi" medalı, həmçinin II dərəcəli "Vətənə xidmətə görə" ordeni ilə təltif edilib.

Şahin Yusifov çıxışında göstərilən diqqətə və fəaliyyətinə verilən qiymətə görə təşəkkürünü bildirib, uzun illər ərzində qazandığı peşəkar təcrübəni və xatirələrini iştirakçılarla bölüşüb.