"Arzum"un cinayət işi təkrar ekspertizaya göndərilib

Yol qəzasında bir nəfərin ölümü və digərinin xəsarət almasında təqsirləndirilən "Arzum" ləqəbli tiktoker İlduzə Hacıyeva apellyasiya şikayəti üzrə məhkəmənin ilkin baxış iclası keçirilib. 

Bakı Apellyasiya Məhkəməsinin hakimi Elnur Nuriyevin sədrliyi ilə keçirilən prosesdə İlduzə Hacıyevanin vəkilləri Hikmət Əliyev və Fərid Həsənov hadisə yerindən Arzumun xəstəxanaya aparan İlham İbrahimovun əlavə şahid kimi ifadə verməsi ilə bağlı vəsatət verib və vəsatət təmin edilib.

Təqsirləndirilənin vəkillərinin sonuncu vəsatəti isə baş verən hadisə ilə bağlı yenidən kompleks ekspertizanın təyin edilməsi ilə bağlı olub.

İlkin ekspertiza zamanı araşdırılmayan xüsüsatların yenidən araşdırılması məqsədi ilə yenidən avtoekspertiza, videogörüntü ilə bağlı ekspertiza və trassaloji ekspertizanın yenidən keçirilməsi istənilib.

Müşavirədən sonra vəkillərin bu vəsatətləri də təmin edilib.

Məhkəmənin növbəti prosesi qeyri müəyyən vaxtadək təxirə salınıb.

Xəzər Rayon Məhkəməsinin hökmünə əsasən "Arzum" ləqəbli tiktoker İlduzə Hacıyeva 5 il 2 ay müddətinə azadlıqdan məhrum edilib.

Daha sonra Apellyasiya Məhkəməsində onun barəsində seçilmiş həbs qətimkan tədbiri ev dustaqlığı ilə əvəz edilib. 

Hadisə 2025-ci ilin iyununda paytaxtın Xəzər rayonu, Mərdəkan qəsəbəsində qeydə alınıb. Qəza nəticəsində qarşı tərəfdən 1 nəfər ölüb, digəri isə ağır xəsarət alıb. 

"Arzum" ləqəbli tiktokerə qarşı Cinayət Məcəlləsinin 263.2-ci (yol hərəkəti və ya nəqliyyat vasitəsinin istismarı qaydalarının pozulması - ölümlə nəticələndikdə) və 264-cü (Yol nəqliyyat hadisəsi yerindən qaçma) maddələri ittiham irəli sürülüb.