Moody's: Azərbaycanda bank islahatları sistem risklərini azaldır və bankların dayanıqlığını artırır

Azərbaycanda bank sektorunda həyata keçirilən prudensial islahatlar sistem risklərinin azalmasına, aktivlərin keyfiyyətinin yaxşılaşmasına və bankların mümkün zərərləri udmaq qabiliyyətinin artmasına töhfə verir. Bunu Beynəlxalq reytinq agentliyi Moody's Ratings bildirib.



Agentliyin qiymətləndirməsinə görə, Azərbaycan prudensial tənzimləməni gücləndirir və beynəlxalq standartların tətbiqini sürətləndirir.

Ölkədə Bazel III çərçivəsində yeni kapital buferləri artıq tətbiq edilib və bank sisteminin 2027-ci il yanvarın 1-dən etibarən Bazel III standartlarına tam uyğunlaşacağı gözlənilir.

Moody's qeyd edir ki, Mərkəzi Asiya və Cənubi Qafqaz ölkələrində, o cümlədən Azərbaycanda bank nəzarətinin beynəlxalq standartlara uyğunlaşdırılması kredit portfellərinin keyfiyyətini yaxşılaşdırır, bankların zərərləri qarşılamaq imkanlarını artırır və sistem risklərini tədricən azaldır.
Agentliyin məlumatına görə, Azərbaycan Mərkəzi Bankının risk əsaslı nəzarət mexanizmlərini tətbiq etməsi və kapital buferlərinə dair tələbləri sərtləşdirməsi bank sektorunun ödəmə qabiliyyətini gücləndirib.

Moody's hesablamalarına əsasən, problemli kreditlərin (Stage 3 və POCI) ümumi kredit portfelində payı 2019-cu ildəki təxminən 14–15%-dən 2025-ci ilin sonuna 3–4%-ə enib.

Problemli kreditlərin maddi kapital və ehtiyatlara (TCE + LLR) nisbəti isə eyni dövrdə 40%-dən yuxarı səviyyədən 10%-dən aşağı düşüb.
Agentlik əlavə edib ki, Azərbaycan bank sistemi mümkün şoklara qarşı kifayət qədər likvidlik səviyyəsini qoruyur.

Bununla yanaşı, Moody's vurğulayıb ki, Beynəlxalq Valyuta Fondu və Dünya Bankının Maliyyə Sektorunun Qiymətləndirilməsi Proqramının (FSAP) nəticələri tənzimləyici mühitdə əlavə islahatlara ehtiyac olduğunu göstərir. Agentlik tənzimləyicinin müstəqilliyinin gücləndirilməsi, konsolidə edilmiş nəzarətin inkişafı və böhranların idarə olunması mexanizmlərinin təkmilləşdirilməsini əsas istiqamətlər kimi göstərib.

Moody's həmçinin dövlətin iqtisadiyyatda yüksək payının korporativ idarəetməyə xüsusi diqqət tələb etdiyini qeyd edib.

Agentliyin proqnozuna görə, davam edən institusional islahatlar sayəsində Azərbaycan bank sektoru kapitallaşma, korporativ idarəetmə və risklərin idarə olunması baxımından Qazaxıstan, Ermənistan və Gürcüstan kimi regional analoqlara daha da yaxınlaşacaq və bu, bankların müstəqil kredit qabiliyyətini dəstəkləyəcək.

Gülnar Nazimqızı