“Hürriyyət”in baş redaktoru Vüqar Məmmədovun məhkəməsində vəsatət təmin edilməyib

“Hürriyyət” qəzetinin və “Hürriyyət TV”nin baş redaktoru Vüqar Məmmədovun cinayət işi üzrə məhkəmənin növbəti iclasında onun ev dustaqlığına buraxılması barədə vəsatət təmin edilməyib.

Bakı Ağır Cinayətlər Məhkəməsində hakim Elmin Rüstəmovun sədrliyi ilə keçirilən prosesdə iş üzrə zərərçəkmiş şəxslərin nümayəndələri ifadə veriblər.

“Azərsun Holdinq”in hüquqşünası N.N. isə bildirib ki, 2025-ci ilin yanvarında holdinqin rəhbəri vəfat etdikdən sonra şirkət barədə “Hürriyyət” qəzetində rüsvayedici yazıların sayı artıb.

Daha sonra müdafiə tərəfinin vəkili Vüqar Məmmədovun səhhətinin nəzərə alınaraq ev dustaqlığına buraxılması barədə vəsatət qaldırıb. Məhkəmə qısa müşavirədən sonra vəsatəti təmin etməyib.

Növbəti məhkəmə iclası oktyabrın 14-nə təyin olunub.

Vüqar Məmmədov 2025-ci il oktyabrın 29-da Dövlət Təhlükəsizliyi Xidmətinin (DTX) “Hürriyyət” qəzeti və “Hürriyyət TV”də keçirdiyi əməliyyat zamanı saxlanılıb. Məhkəmənin qərarı ilə onun barəsində həbs qətimkan tədbiri seçilib.

Məmmədova Cinayət Məcəlləsinin 182.2.2-ci (hədə-qorxu ilə tələb etmə, təkrar törədildikdə) və 182.2.4-cü (hədə-qorxu ilə tələb etmə, xeyli miqdarda əmlak əldə etmək məqsədilə törədildikdə) maddələri ilə yekun ittiham elan edilib. Təqsirləndirilən şəxsin təqsiri məhkəmənin qanuni qüvvəyə minmiş hökmü ilə təsdiqlənməyib.