Ağcabədidə icra başçısını təhqir edən şəxs 8 gün həbs edilib

Ağcabədi rayonunun Şahsevən Təzəkənd kəndində ümumi istifadədə olan yolu bağlayan sakin inzibati qaydada 8 gün müddətinə həbs edilib.

Xitab24.az-ın məlumatına görə, 1992-ci il təvəllüdlü kənd sakini evinin qarşısından kənd sakinlərinin mal-qara aparıb-gətirməsindən ailəsinin narahat olduğunu bildirib.

Sakin məsələ ilə bağlı kənd icra nümayəndəliyinə müraciət etsə də, xahişinin təmin olunmadığını deyib. Bundan sonra o, yolu bağlayıb və bununla bağlı polisə müraciət edilib.

Məlumata görə, həmin şəxs sərxoş vəziyyətdə kənd sakinlərini və Ağcabədi Rayon İcra Hakimiyyətinin başçısı Rafil Hüseynovu təhqir edib, həmçinin polisin qanuni tələblərinə tabe olmayıb.

Onun barəsində inzibati protokol tərtib edilərək məhkəməyə göndərilib.

Ağcabədi Rayon Məhkəməsinin qərarı ilə şəxs 8 gün müddətinə inzibati həbs cəzasına məhkum edilib.