Bakıda, Sumqayıt və Abşeronda ağacların qanunsuz kəsilməsi nəticəsində 72 min manatlıq ziyan vurulub

Bakı, Sumqayıt və Abşeron rayonunda ağacların qanunsuz kəsilməsi nəticəsində yaşıllıqlara ümumilikdə 71 940 manat ziyan dəydiyi müəyyən edilib.

Dövlət Ekoloji Təhlükəsizlik Xidmətinin məlumatına görə, faktlar xidmət əməkdaşlarının son bir həftə ərzində keçirdiyi nəzarət tədbirləri zamanı aşkar olunub.

Araşdırmalar zamanı qanunsuz ağac kəsintisi Bakı şəhərinin Xətai rayonunda Vunqtau küçəsində, Sumqayıt şəhərinin 4-cü məhəlləsində və Abşeron rayonunun Masazır qəsəbəsində Rafiq Dünyamalıyev küçəsində müəyyən edilib.

Xidmət bildirib ki, hər üç fakt üzrə yaşıllıqlara dəymiş ziyanın məbləği cinayət tərkibi yaradıb.

Bununla əlaqədar toplanmış materiallar hüquqi qiymət verilməsi üçün hüquq-mühafizə orqanlarına göndərilib.