Azərbaycanda 2026-cı il üzrə iqtisadi artım proqnozu 1,7%-ə endirilib

Azərbaycan hökuməti 2026-cı il üzrə iqtisadi artım və inflyasiya proqnozlarını yeniləyib. Yenilənmiş proqnoza əsasən, ÜDM-in real ifadədə 1,7% artaraq 138 milyard manata çatacağı, orta illik inflyasiyanın isə 5,7% təşkil edəcəyi gözlənilir. Bu barədə Maliyyə Nazirliyinin açıqladığı proqnozlarda qeyd olunub. 

Yeni proqnoza əsasən, qeyri-neft ÜDM-i real ifadədə 3,1% artaraq 100 milyard manata yüksələcək. Bununla yanaşı, qeyri-neft-qaz sektorunda iqtisadi artım proqnozu əvvəlki 5%-dən 3,1%-ə endirilib.

Nazirlik bunu əsasən tikinti və turizm sektorlarında gözlənilən artım templərinin əvvəlki proqnozlarla müqayisədə daha aşağı olması ilə əlaqələndirib.

İnflyasiya üzrə proqnoz isə əksinə, yüksəldilib. Belə ki, 2026-cı il üçün orta illik inflyasiya gözləntisi 4,8%-dən 5,7%-ə qaldırılıb. Buna faktiki inflyasiya göstəriciləri, dünya əmtəə və ərzaq qiymətlərindəki dəyişikliklər, onların idxal qiymətlərinə təsiri və tənzimlənən mal və xidmət tariflərindəki dəyişikliklər təsir edib.

Gülnar Nazimqızı