AÇG-də “Mərkəzi Azəri” platformasında 11 günlük profilaktik işlər başlayır

“Azəri-Çıraq-Günəşli” (AÇG) yataqlar blokunda “Mərkəzi Azəri” platformasında planlaşdırılmış profilaktik işlərə başlanılıb. Bu barədə bp-nin yaydığı məlumatda deyilir. 

AÇG-nin illik iş proqramı çərçivəsində həyata keçirilən işlər 11 gün davam edəcək. Bu müddətdə platformada hasilatın həcmi müvəqqəti olaraq azaldılacaq, lakin tam dayandırılmayacaq.

Profilaktik işlərin “Azəri” sahəsindəki qurğuların inteqrasiya olunmuş layihələndirməsi və əməliyyat konfiqurasiyası səbəbindən “Şərqi Azəri” və “Qərbi Azəri” platformalarında hasilata da müvəqqəti təsir edəcəyi bildirilir.

Proqrama texniki xidmət və avadanlıqların bütövlüyünün yoxlanılması, məşəl sisteminin təkmilləşdirilməsi, etibarlılığın artırılması və müəyyən edilmiş texniki problemlərin aradan qaldırılması üzrə işlər daxildir.

Proqram çərçivəsində həmçinin “Mərkəzi Azəri Qaz Genişləndirilməsi” (CAGE) layihəsi üzrə bir sıra işlər görüləcək. Məqsəd qazın laylara yenidən vurulması imkanlarını artırmaq və mövcud quyulardan neft hasilatının maksimum səviyyəyə çatdırılmasına şərait yaratmaqdır.

bp bildirib ki, profilaktik işlər 2026-cı ilin illik iş proqramı və büdcəsində əvvəlcədən nəzərdə tutulub. Hazırlıq işlərinə 2025-ci ildən başlanılıb və hasilatın müvəqqəti azalması builki hasilat planında nəzərə alınıb.

AÇG-nin digər platformalarında, eləcə də “Şahdəniz” yatağının platformalarında hasilatın və Səngəçal terminalındakı əməliyyatların normal rejimdə davam edəcəyi bildirilib.

AÇG Xəzər dənizinin Azərbaycan sektorunda yerləşən əsas neft yataqları bloklarından biridir. Yataqlar blokunun işlənməsi üzrə hasilatın pay bölgüsü sazişi 1994-cü ildə imzalanıb. bp AÇG üzrə operator kimi fəaliyyət göstərir. Planlaşdırılmış profilaktik xidmət və təmir işləri yataq obyektlərinin uzunmüddətli təhlükəsizliyi, etibarlılığı və fasiləsiz istismarı üçün müntəzəm olaraq həyata keçirilir.