KMBİ maliyyə təşkilatlarının adından saxta kredit səhifələri yaradan şəxsi saxlayıb

Daxili İşlər Nazirliyinin (DİN) Kibercinayətkarlıqla Mübarizə Baş İdarəsi (KMBİ) maliyyə təşkilatlarının adından saxta kredit səhifələri yaradaraq vətəndaşların bank məlumatlarını ələ keçirən şəxsi saxlayıb.

DİN-dən verilən məlumata görə, keçirilən əməliyyat-texniki tədbirlər nəticəsində bu əməlləri törətməkdə şübhəli bilinən Elcan Cəfərov tutulub.

Araşdırma zamanı müəyyən edilib ki, E.Cəfərov sosial şəbəkələrdə bank olmayan kredit təşkilatlarının rəsmi səhifələrinə vizual olaraq oxşar saxta səhifələr yaradıb. O, daha çox şəxsi cəlb etmək məqsədilə həmin səhifələri sosial şəbəkələrdə və “WhatsApp” qruplarında reklam edib.

Saxta səhifələrə daxil olan vətəndaşlardan kredit rəsmiləşdirilməsi adı ilə bank kartının nömrəsi, son istifadə tarixi, CVV və OTP kodları tələb olunub.

İstintaq materiallarına əsasən, əldə edilən məlumatlardan istifadə etməklə vətəndaşların bank kartlarındakı vəsaitlər başqa şəxslərin hesablarına köçürülərək nağdlaşdırılıb.

Faktla bağlı KMBİ-də cinayət işi başlanılıb. E.Cəfərov cinayət məsuliyyətinə cəlb olunub və məhkəmənin qərarı ilə barəsində həbs qətimkan tədbiri seçilib.

DİN vətəndaşlara sosial şəbəkələrdə yayılan kredit elanlarının doğruluğunu yoxlamağı, maliyyə xidmətlərindən istifadə etməzdən əvvəl müvafiq qurumun qanuni fəaliyyət göstərdiyinə əmin olmağı tövsiyə edib.

Nazirlik həmçinin xəbərdarlıq edib ki, bank kartlarının məlumatları, xüsusilə CVV/CVC və OTP kodları tanımadıqları şəxslərə və şübhəli internet səhifələrinə təqdim edilməməlidir. Banklar, dövlət qurumları və digər rəsmi təşkilatlar telefon, mesaj və ya sosial şəbəkələr vasitəsilə bu məlumatları tələb etmir.