Goranboyda sursat anbarında partlayış baş verib - birgə məlumat

Goranboy rayonunda sursat anbarında yanğınla müşayiət olunan partlayış baş verib, hadisə nəticəsində xəsarət alan olmayıb. Bu barədə Fövqəladə Hallar, Müdafiə və Daxili İşlər nazirliklərinin çərşənbə günü yaydığı birgə məlumatda bildirilib.

Məlumata görə, partlayış sentyabrın 2-nə keçən gecə Goranboy rayonunun Nizami kəndi yaxınlığında yerləşən sursat anbarında baş verib.

Hadisədən sonra Fövqəladə Hallar və Müdafiə nazirliklərinin qüvvələri Daxili İşlər Nazirliyi və Goranboy Rayon İcra Hakimiyyəti ilə birgə təxirəsalınmaz tədbirlər görüb və vəziyyət nəzarət altına alınıb.

Təhlükəsizlik məqsədilə ərazinin yaxınlığında olan insanlar təxliyə edilib.

Rəsmi qurumlar partlayışın səbəbi və sursat anbarına dəymiş ziyanın həcmi barədə məlumat verməyib.

Gülnar Nazimqızı