Ərdoğan BƏƏ Prezidenti ilə İran-ABŞ gərginliyini müzakirə edib

Türkiyə Prezidenti Rəcəb Tayyib Ərdoğan Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Al Nəhyan ilə telefon danışığı aparıb.Bu barədə Türkiyə Prezident Administrasiyasının Kommunikasiya İdarəsi məlumat yayıb.

Telefon danışığı zamanı Türkiyə ilə BƏƏ arasında ikitərəfli münasibətlər, həmçinin regional və qlobal məsələlər müzakirə olunub.

Ərdoğan iki ölkə arasında, xüsusilə müdafiə sənayesi və iqtisadiyyat sahələrində əməkdaşlığın genişlənəcəyini bildirib.

Türkiyə Prezidenti İran-ABŞ gərginliyinin və regiondakı digər münaqişələrin sona çatdırılması üçün Ankaranın səylərini davam etdirdiyini qeyd edib.

O, Türkiyənin sülhə yönəlmiş diplomatik təşəbbüslərini davam etdirəcəyini və regiondakı qardaş ölkələrə qarşı hücumları qəbul etmədiyini vurğulayıb. Ərdoğan digər regional məsələlər üzrə də Türkiyə ilə BƏƏ arasında əməkdaşlığın əhəmiyyətini qeyd edib.