Qalib Bayramova 8 il həbs cəzası verilib, cəzası şərti hesab olunub

“QHT işi” üzrə ittiham olunan İqtisadi Tədqiqatlar Mərkəzi İctimai Birliyinin Mərkəzi İdarə Heyətinin sədri Qalib Bayramov 8 il müddətinə azadlıqdan məhrum edilib, lakin cəzası şərti hesab olunub.

Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən prosesdə hökm elan olunub.

Hökmə əsasən, Qalib Bayramov 2 il müddətinə müəyyən vəzifələr tutmaq hüququndan məhrum edilməklə 8 il həbs cəzasına məhkum edilib. Onun cəzası 3 il sınaq müddəti müəyyən edilməklə şərti hesab olunub.

Məhkəmə həmçinin onun barəsində seçilmiş polis nəzarəti altına vermə qətimkan tədbirini başqa yerə getməmək barədə iltizam tədbiri ilə əvəz edib.

Dövlət ittihamçısı Bayramovun 9 il müddətinə azadlıqdan məhrum edilməsini, cəzasının isə 5 il sınaq müddəti ilə şərti hesab olunmasını təklif etmişdi.

Qalib Bayramova qarşı Cinayət Məcəlləsinin cinayət yolu ilə əldə edilmiş əmlakın leqallaşdırılması və vəzifə səlahiyyətlərindən sui-istifadə maddələri ilə ittiham irəli sürülüb.

Aytac Zeynalova