Sabunçuda qolları olmayan körpə doğulub, anası ondan imtina edib

 Bakının Sabunçu rayonunda yerləşən tibb müəssisələrindən birində anadangəlmə yuxarı ətrafları olmayan körpə dünyaya gəlib. Bu barədə Unikal məlumat yayıb. 

Doğuşdan sonra körpənin anası övladından rəsmi şəkildə imtina edib.

Faktı Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyi təsdiqləyib.

Agentlikdən bildirilib ki, uşağın anası tərəfindən tərk edilməsi barədə məlumat daxil olduqdan sonra əməkdaşlar prosesə cəlb olunub. Körpənin səhiyyə müəssisəsində vəziyyəti qiymətləndirilib.

“Uşaq daimi qayğı ilə əhatə olunması üçün qanunvericiliyə uyğun olaraq müvafiq uşaq müəssisəsinə yerləşdiriləcək”, - Agentlik qeyd edib.

Qanunvericiliyə əsasən, valideyn himayəsindən məhrum olmuş uşaqların sosial müdafiəsi və onların uyğun müəssisələrdə yerləşdirilməsi dövlət tərəfindən təmin edilir.