Deputat süni intellektlə bağlı ayrıca qanunun qəbulunu təklif edib

Azərbaycanda süni intellektdən istifadənin tənzimlənməsi üçün ayrıca qanun qəbul edilməlidir. Bunu deputat Ceyhun Məmmədov Milli Məclisin elm və təhsil komitəsinin iclasımda çıxışı zamanı bildirib.


Onun sözlərinə görə, süni intellektin yaratdığı imkanlarla yanaşı, xüsusilə təhsil sahəsində doğurduğu risklər də nəzərə alınmalıdır.

“Süni intellekt gənclərimizin araşdırma, təhlil və müstəqil düşünmə qabiliyyətinə mənfi təsir göstərməməlidir”, - Məmmədov parlamentdə çıxışı zamanı deyib.

Deputat həmçinin “Ali təhsil haqqında” qanun layihəsinin hazırlanmasının sürətləndirilməsini, dünyada təhsil sahəsində gedən dəyişikliklərin qanunda əks olunmasını təklif edib.

Məmmədov bakalavr təhsilinin üç, magistratura təhsilinin isə bir ilə endirilməsi imkanının müzakirəyə çıxarılmasını məqsədəuyğun sayıb.

Onun sözlərinə görə, magistratura pilləsində hər il təxminən 4,000 və ya daha çox yer boş qalır və bunun səbəblərindən biri təhsil müddətinin iki il olmasıdır.

Deputat doktorantura təhsilində mövcud iki pillənin birləşdirilməsi prosesinin də sürətləndirilməsini istəyib.

O bildirib ki, elmi işi hazır olan bir sıra tədqiqatçılar uzun müddət müdafiə edə bilmirlər və bu vəziyyət onların əməkhaqqına və motivasiyasına təsir göstərir.

Məmmədov həmçinin məktəblərdə tərbiyə işinin gücləndirilməsi üçün ayrıca proqramın qəbulunu, ali məktəblərdə təhsilin keyfiyyətinin artırılmasını və peşə təhsilinə münasibətdə mövcud stereotiplərin aradan qaldırılmasını təklif edib.

O, İnsan Kapitalı İndeksi üzrə Azərbaycanın nəticələrinin geniş müzakirəyə çıxarılmasına və ölkənin geridə qaldığı istiqamətlər üzrə tədbirlərin müəyyənləşdirilməsinə ehtiyac olduğunu da bildirib.

Gülnar Nazimqızı