Azər Aydəmir DİN-ə səsləndi: Bayır şəhərdə ağır hadisə baş vermədən tədbir görülsün

Aktyor Azər Aydəmir Bayır şəhər ərazisində nəzarətsiz qalan söküntü sahələrinin sakinlərin təhlükəsizliyi və ictimai asayiş üçün risk yaratdığını bildirib.

O, Daxili İşlər Nazirliyinə və Dövlət Şəhərsalma və Arxitektura Komitəsinə müraciət edərək, söküntü sahələrində müvəqqəti mühafizə xidmətinin təşkil olunmasını istəyib.

“Son günlər nəzarətsiz qalan ərazilərdə müxtəlif xoşagəlməz hallar müşahidə olunur. Dağıntılar və boş sahələr tualet kimi istifadə edilir, burada spirtli içkilər və digər maddələr qəbul olunur, müxtəlif şəxslər toplaşırlar”, - Aydəmir bildirib.

Onun sözlərinə görə, söküntü sahələri arasındakı kiçik küçələr, keçidlər və işıqlandırılmayan ərazilər axşam saatlarında sakinlər üçün təhlükəli vəziyyət yaradır.

“Söküntü tam başa çatanadək, qalıqlar daşınanadək və ərazilər bağlananadək həmin sahələrin nəzarətsiz qalması ciddi riskdir. Ümid edirəm ki, daha ağır hadisə baş verməzdən əvvəl tədbir görüləcək”, - aktyor deyib.

Aydəmir aidiyyəti qurumlardan ərazidə nəzarətin gücləndirilməsini və sakinlərin təhlükəsizliyinin təmin olunmasını istəyib.