Azərbaycanın Hindistanla ticarət dövriyyəsi 600 milyon dollar olub

2026-cı ilin yanvar-sentyabrında Azərbaycanın Hindistanla ticarət dövriyyəsi 600 milyon dollar təşkil edib. Bunu Azərbaycanın xarici işlər naziri Ceyhun Bayramov oktyabrın 23-də Bakıda hindistanlı həmkarı Subrahmanyam Cayşankarla birgə keçirdiyi mətbuat brifinqində bildirib.

Nazir qeyd edib ki, bu göstərici iki ölkənin mövcud potensialını tam əks etdirmir və iqtisadi əməkdaşlığın genişləndirilməsi üçün böyük imkanlar var.

Bayramovun sözlərinə görə, Hindistan şirkətlərinin Azərbaycanın enerji sektorunda iştirakı iki ölkə arasında əməkdaşlığın mühüm istiqamətlərindən biridir. O, Hindistanın ONGC Videsh şirkətinin Azərbaycanın strateji enerji layihələrində iştirakını bu əməkdaşlığın möhkəm təməlinin göstəricisi kimi qiymətləndirib.

Nazir bildirib ki, hazırda Azərbaycanda 1 000-dən çox Hindistan şirkəti qeydiyyatdan keçib və fəaliyyət göstərir. O əlavə edib ki, bu yaxınlarda keçirilən II Azərbaycan Beynəlxalq Tibb İnvestisiya Forumunda Hindistanın daha bir böyük şirkəti Azərbaycanda investisiya layihələrinə başlayacağını elan edib.

Bayramov vurğulayıb ki, tərəflər biznes strukturlarını bir araya gətirmək, əlavə əməkdaşlıq imkanlarını araşdırmaq və bu istiqamətdə təşəbbüsləri təşviq etmək barədə razılığa gəliblər.

Nazir, həmçinin Hindistan şirkətlərinin tibb və əczaçılıq sahələrində dünya miqyasında aparıcı istehsalçılar sırasında olduğunu qeyd edib. Onun sözlərinə görə, Hindistan istehsalçılarının tibbi ləvazimatları və dərman məhsulları Azərbaycan bazarında geniş təmsil olunur.

Aytac Zeynalova