Yasamal və Xəzər rayonlarının bəzi ərazilərində işıq olmayacaq

Yasamal və Xəzər rayonlarının bəzi ərazilərində sentyabrın 14-də təmir və yenidənqurma işləri ilə əlaqədar elektrik enerjisinin verilişi müvəqqəti məhdudlaşdırılacaq.Bu barədə “Azərişıq” ASC məlumat yayıb.

Bildirilib ki, elektrik enerjisinin verilişində keyfiyyət göstəricilərinin yaxşılaşdırılması və artan yük tələbatının qarşılanması məqsədilə Yasamalda transformator məntəqəsində, Xəzər rayonunda isə 6 kV-luq hava xəttində işlər aparılacaq.

Yasamal rayonunun bəzi ərazilərində, o cümlədən Xıdır Mustafayev, İslam Səfərli, Mirzə Cabbar Məmmədzadə, Şıxəli Qurbanov, Ümid Əkbərov, Vasif Əliyev və Zaur Kərimov küçələrinin bir hissəsində saat 10:00-dan 13:00-dək elektrik enerjisinin verilişi məhdudlaşdırılacaq.

Xəzər rayonunun Buzovna qəsəbəsində, Albalılıq yaşayış massivində, Abşeron və İzmir küçələrinin bəzi ərazilərində isə saat 10:00-dan 15:00-dək elektrik enerjisinin verilişi dayandırılacaq.

“Azərişıq”-dan  bildirilib ki, işlər başa çatdıqdan sonra həmin ərazilərdə elektrik enerjisinin təchizatı yaxşılaşdırılacaq.