Qarabağ Universitetinə qəbul olunanların 60 faizdən çoxu qızlardır

 2026-2027-ci tədris ili üzrə Qarabağ Universitetinə qəbul olunan 1 235 tələbənin 60 faizdən çoxunu qızlar təşkil edir. Bu barədə elm və təhsil naziri Emin Əmrullayev jurnalistlər üçün keçirilən brifinqdə məlumat verib.

Onun sözlərinə görə, bu il universitetə 49 ixtisas üzrə 1 403 plan yerindən 1 235-i tutulub. Qəbul olunanların 603-ü 500 və daha yüksək bal toplayıb ki, bu da ötən illə müqayisədə 269 nəfər çoxdur.

600 və daha yüksək bal toplayan tələbələrin sayı 196 nəfər olub. Bu göstərici 2025–2026-cı tədris ili ilə müqayisədə təxminən 1,5 dəfə, 2024–2025-ci tədris ili ilə müqayisədə isə təxminən iki dəfə çoxdur.

Keçid balı 500-dən yüksək olan ixtisasların sayı 13-dür. Ən yüksək keçid balı Tibb ixtisasında 634,2, Stomatologiyada 624,3, Hüquqşünaslıq ixtisasında isə 600,8 və 600,1 olub.

Qarabağ Universiteti Xankəndidə fəaliyyət göstərir və azad edilmiş ərazilərdə ali təhsil infrastrukturunun formalaşdırılması çərçivəsində yaradılıb.

Gülnar Nazimqızı