Bəzi bakalavr ixtisaslarında təhsil müddətini üç ilə endirə bilər – nazir

Azərbaycanda bəzi bakalavr ixtisasları üzrə təhsil müddəti dörd ildən üç ilə endirilə bilər. Bunu elm və təhsil naziri Emin Əmrullayev bazar ertəsi bildirib.

Nazir bunun bütün ixtisaslara şamil edilməsinin nəzərdə tutulmadığını və qərarın mütəxəssislərlə işəgötürənlərin rəyindən asılı olacağını deyib.

“Əgər mütəxəssislər və bu sahənin işəgötürənləri hesab etsələr ki, üç il də kifayətdir, mən düşünürəm ki, bəzi sahələrdə bunu üç il etmək olar”, - Əmrullayev bildirib.

Onun sözlərinə görə, təhsil müddətinin qısaldılması məzunların əmək bazarına daha tez çıxmasına imkan verə bilər.

Əmrullayev eyni zamanda Azərbaycanın 12 illik tam orta təhsil sisteminə keçməyi planlaşdırmadığını deyib.

“On iki illik təhsilə keçid nəzərdə tutulmur. Təbii ki, ‘12+3’ müəyyən mənada işlək model ola bilər. Hazırda biz ‘11+4’ modelindən danışırıq”, - nazir bildirib.

Milli Məclisdə ötən həftə keçirilən müzakirələrdə bəzi deputatlar və parlament rəsmiləri Azərbaycanda 12 illik tam orta təhsil və üçillik bakalavr modelinə keçidi təklif ediblər.

Milli Məclis Aparatının Sosial qanunvericilik şöbəsinin müdiri Adil Vəliyev bildirib ki, Avropanın bir sıra ölkələrində tətbiq olunan üçillik bakalavr modelinə keçid üçün Azərbaycanda əvvəlcə tam orta təhsilin müddətinin 12 ilə çatdırılması məqsədəuyğun olardı.

Deputat Eldar Quliyev də bakalavr təhsilinin üç ilə endirilməsi məsələsinə yenidən baxılmasını təklif edib.

Azərbaycanda hazırda tam orta təhsil 11 il, bakalavr proqramlarının əksəriyyəti isə dörd ildir. Nazirlik məktəbəhazırlıq mərhələsi də nəzərə alındıqda ümumi təhsil prosesinin faktiki olaraq 12 ili - bir il məktəbəhazırlıq və 11 il məktəb təhsilini - əhatə etdiyini bildirir.

Gülnar Nazimqızı