Azərbaycan və ADB “yaşıl maliyyə”nin inkişafını müzakirə edib

 Azərbaycan Mərkəzi Bankı və Asiya İnkişaf Bankı (ADB) ölkədə “yaşıl maliyyə”nin və kapital bazarlarının inkişafı imkanlarını müzakirə edib.

Mərkəzi Bankın məlumatına görə, qurumun sədrinin birinci müavini Əliyar Məmmədyarov ADB-nin Direktorlar Şurasının nümayəndə heyəti ilə görüşüb.

Görüşdə Azərbaycanın makroiqtisadi vəziyyəti, maliyyə sektorunda aparılan islahatlar və “Maliyyə inklüzivliyinin genişləndirilməsinə dair 2027–2030-cu illər üçün Dövlət Proqramı” çərçivəsində nəzərdə tutulan tədbirlərin icrasına ADB-nin dəstək imkanları nəzərdən keçirilib.

Tərəflər həmçinin “yaşıl maliyyə” və kapital bazarlarının inkişafı, ADB-nin Azərbaycan üzrə Ölkə Tərəfdaşlıq Strategiyasının əsas istiqamətləri, əməkdaşlığın genişləndirilməsi və gələcək texniki yardım layihələri barədə fikir mübadiləsi aparıblar.

“Yaşıl maliyyə” ekoloji və iqlim məqsədlərinə töhfə verən layihələrin maliyyələşdirilməsini nəzərdə tutur və son illərdə maliyyə sektorunda inkişaf etdirilən əsas istiqamətlərdən biridir.