Allahşükür Paşazadə İlham Əliyevə təşəkkür edib

Şeyxülislam Allahşükür Paşazadə Azərbaycan Prezidenti İlham Əliyevə ona verdiyi qiymətə görə təşəkkür edib.

Paşazadə bu barədə sentyabrın 15-də Prezident İlham Əliyevin Türk Dövlətləri Təşkilatının Baş katibi Kubanıçbek Ömüralıyev, TDT-nin Müsəlman Dini İdarə Rəhbərləri Şurasının üzvləri və müşahidəçiləri, Yəhya Bakuvi Beynəlxalq Konfransının həmtəşkilatçıları və Qafqaz Xalqları Ali Dini Şurasının nümayəndə heyəti ilə görüşündə danışıb.

Şeyxülislam bildirib ki, Azərbaycan Prezident İlham Əliyevin rəhbərliyi ilə inkişaf edir və dünyada zirvələri fəth edir.

“ Sizin rəhbərliyinizlə suverenliyimizin, ərazi bütövlüyümüzün tam şəkildə bərpa edilməsi bizim üçün böyük ərməğan olub. Biz onu ancaq röyalarımızda görürdük. Amma həyatda Allah-taala mənə bunu görməyi nəsib etdi”, - Paşazadə deyib.

O, Azərbaycanın qələbəsində Prezidentin daxili və xarici siyasəti ilə yanaşı, xalqın birliyinin də mühüm rol oynadığını vurğulayıb.

Şeyxülislam qeyd edib ki, Prezidentin qarşısında onun üçün daha böyük vəzifələr qoyduğunu bildirib.

“Verdiyiniz bu qiymətə görə mən imkan daxilində həyatımda əlimdən gələni edəcəyəm ki, gələcəkdə də İslam dünyasında, dinlər arasında münasibətləri, qardaşlıq münasibətlərini, bir də Azərbaycanın İslam həmrəyliyini, tolerantlığını bütün dünyada yaya bilim və çatdıra bilim”, - o əlavə edib.