ABŞ ordusu SEPAH-ın iki katerini məhv edib

ABŞ hərbçiləri ABŞ Hərbi Dəniz Qüvvələrinə məxsus pilotsuz suüstü aparatı ələ keçirməyə cəhd edən İranın İslam İnqilabı Keşikçiləri Korpusuna (SEPAH) məxsus iki katerini məhv edib.

“Axios” xəbər verir ki, bunu ABŞ Silahlı Qüvvələrinin Mərkəzi Komandanlığının (CENTCOM) sözçüsü, kapitan Tim Hokins təsdiqləyib.

Hokinsin sözlərinə görə, İranın kiçik gəmiləri ABŞ-a məxsus pilotsuz aparatı ələ keçirməyə cəhd edib. Lakin CENTCOM qüvvələrinin müdaxiləsindən sonra bu cəhdin qarşısı alınıb və aparat ABŞ qüvvələrinin nəzarətində qalıb.

İran mediası isə hadisə zamanı balıqçı qayıqlarının vurulduğunu və bir neçə balıqçının itkin düşdüyünü qeyd edib.

Hokins həmçinin “Axios”a bildirib ki, ABŞ Hərbi Dəniz Qüvvələrinin gəmiləri hazırda Hörmüz boğazından keçən tankerləri təkcə gecə deyil, gündüz saatlarında da müşayiət edir. Bu, son həftələrdə tətbiq olunan müşayiət rejimindən fərqlənir.