Qubadlıda ilk su elektrik stansiyası tikilir - Video

Qubadlı rayonunda Bərgüşad çayı üzərində 5,3 meqavat gücündə “Eyvazlı” Su Elektrik Stansiyası (SES) inşa edilir.Bu barədə "AzərEnerji” ASC xəbər verir.

Dövlət başçısının tapşırığına uyğun olaraq tikilən stansiya Qubadlı rayonunda inşa edilən ilk su elektrik stansiyası olacaq.

Məlumata görə, stansiyanın dayanıqlı su təminatı üçün Bərgüşad çayı üzərində ekoloji normalara uyğun baş suqəbuledici qurğu inşa edilib. Mürəkkəb relyef şəraitində 5,3 kilometr uzunluğunda derivasiya boru xətti çəkilib, maşın zalının tikintisi başa çatdırılıb.

Hazırda turbin və generatorların, eləcə də 35 və 10 kilovoltluq qapalı paylayıcı qurğuların quraşdırılması işləri aparılır. İki Frensis tipli turbinlə təchiz ediləcək stansiyada tikinti-quraşdırma işlərinin yaxın vaxtlarda yekunlaşdırılması nəzərdə tutulur.

“Eyvazlı” SES 2021-ci ildə tikilərək istismara verilmiş 110 kilovoltluq “Qubadlı” yarımstansiyası vasitəsilə ölkənin vahid enerjisisteminə qoşulacaq.

Stansiyanın istismara verilməsi ilə Qubadlı da işğaldan azad edilmiş ərazilərdə “yaşıl” hidroenerji istehsal edən rayonların sırasına qoşulacaq.

Məlumata görə, SES-də ildə 15,6 milyon kilovat-saat ekoloji cəhətdən təmiz enerji istehsalı, 3,5 milyon kubmetr təbii qaza qənaət edilməsi və atmosferə 6 400 ton karbon qazı emissiyasının qarşısının alınması nəzərdə tutulur.