ABŞ Rusiya kəşfiyyatı ilə əlaqəli sui-qəsd planına görə beş nəfəri ittiham edib

ABŞ Ədliyyə Nazirliyi Rusiya kəşfiyyat xidmətlərinin tapşırığı ilə ABŞ və Avropada müxalif şəxslərə qarşı sui-qəsdlər və Ukraynanı dəstəkləyən ölkələrdə təxribatlar hazırlamaqda şübhəli bilinən beş nəfərə qarşı ittiham irəli sürüb. Bu barədə ABŞ mətbuatı yazıb.

Şəbəkə 2024-cü ildən etibarən ABŞ və digər ölkələrdə Rusiya müxalifətçilərini izləmək və öldürmək üçün şəxslər cəlb edib.

Onun üzvləri, həmçinin Ukraynanı dəstəkləyən Avropa ölkələrində mülki və hərbi infrastruktura hücumların təşkilində ittiham olunur.

İttiham olunanlar Rusiya vətəndaşları - Rusiya xüsusi xidmət orqanlarının keçmiş polkovniki, “Polkovnik Yuri” ləqəbli 63 yaşlı Yuri Xrameyev və onun oğlu, Federal Təhlükəsizlik Xidmətinin əməkdaşı 27 yaşlı Kirill Xrameyev; Kuba vətəndaşları Oemis Romaqosa Durruti, 35, və “Vikinq” ləqəbli Yaidel Delqado Suares, 35; habelə Venesuela vətəndaşı, 22 yaşlı Angel Eduardo Castrodur.

ABŞ rəsmilərinin bildirdiyinə görə, şəbəkə bu yay Vaşinqton ərazisində yaşadığı güman edilən tanınmış rusiyalı müxalifətçinin izlənilməsi üçün ABŞ sakininə 1,000-1,500 dollar, onun öldürülməsi üçün isə 40,000 dollar təklif edib. Həmin şəxs qətli törətməkdən imtina edib.

Nazirliyin məlumatına görə, 2025-ci ildə başqa bir şəxsə Litvada yaşayan rusiyalı müxalifətçinin öldürülməsi üçün 25,000 dollar təklif olunub.

Durruti, həmçinin 2024-cü ilin iyununda Praqada hücumun, həmin ilin sentyabrında isə Litvada başqa bir əməliyyatın logistikasını əlaqələndirməkdə ittiham edilir.

Beş şəxsin hamısı terrorizmin maliyyələşdirilməsi məqsədilə əlbir olmaqda ittiham olunub. Bu maddə üzrə maksimum cəza 20 il həbsdir. Yuri Xrameyev, Suares və Castroya qarşı muzdlu qətlin təşkili məqsədilə əlbir olmaq ittihamı da irəli sürülüb. Bu maddə maksimum 10 il həbs cəzası nəzərdə tutur.

FTB-nin Vaşinqton ofisinin rəhbəri Darren Koks bildirib ki, istintaq ABŞ paytaxtında və ölkənin digər ərazilərində zorakılıq törətmək planlarının qarşısını alıb.

Təqsirləndirilən şəxslərin hamısı azadlıqdadır. ABŞ qanunvericiliyinə əsasən, ittihamlar məhkəmədə sübuta yetirilənədək onlar təqsirsiz sayılırlar.

Rusiyanın ABŞ-dakı səfirliyi ittihamlarla bağlı şərh sorğusuna dərhal cavab verməyib. Moskva daha əvvəl xarici ölkələrdə sui-qəsd və təxribat əməliyyatları həyata keçirməsi barədə oxşar iddiaları rədd edib.

Moskvanın tənqidçilərinə qarşı xaricdə təzyiq göstərməsi ilə bağlı iddialar Rusiyanın 2022-ci ildə Ukraynaya genişmiqyaslı müdaxiləsindən sonra Qərb ölkələrinin diqqət mərkəzinə düşüb. ABŞ və Avropa rəsmiləri Rusiyanı Ukraynaya dəstəyi zəiflətmək məqsədilə Avropada təxribat kampaniyaları aparmaqda dəfələrlə ittiham ediblər.

Gülnar Nazimqızı