Artıq narkobaronlarla mübarizə aparmalıyıq - deputatdan təklif

Azərbaycanda narkotiklərin qanunsuz dövriyyəsinə qarşı mübarizə narkokuryerlərin saxlanılması ilə məhdudlaşmamalı, cinayət şəbəkələrini idarə edən narkobaronların ifşasına yönəlməlidir. Bunu Milli Məclisin deputatı Hikmət Babaoğlu bildirib.

“Biz hələlik genofondumuzu sıradan çıxaran, bizə qarşı tiryək müharibəsi elan edən ölkələrlə narkokuryerlər səviyyəsində mübarizə aparırıq. Məncə, bir mərhələ yuxarı qalxmalı və narkobaronlarla mübarizə aparmalıyıq”, - Babaoğlu Milli Məclisdə çıxışı zamanı deyib.

Onun sözlərinə görə, narkotiklərin dronlar və digər vasitələrlə sərhəddən keçirilməsinin arxasında dayanan şəbəkələrin, o cümlədən onların ölkə daxilində mümkün əlaqələrinin müəyyənləşdirilməsi vacibdir.

Babaoğlu hüquq-mühafizə orqanlarının belə şəbəkələrə qarşı imkanlarının genişləndirilməsi üçün yeni qanunvericilik mexanizmlərinin hazırlanmasını təklif edib. O, bu mexanizmlərin məzmunu barədə ətraflı məlumat verməyib.
Deputat, həmçinin narkotiklərin daşınmasında istifadə edilən yük avtomobilləri və digər nəqliyyat vasitələrinin dövlətin xeyrinə müsadirəsini nəzərdə tutan ayrıca qanunun qəbul olunmasını təklif edib.

Onun fikrincə, nəqliyyat vasitəsinin itirilməsi riski həm sürücülər, həm də avtomobil sahibləri üçün əlavə çəkindirici tədbir ola bilər.

Babaoğlu narkotiklərin sərhəddən keçirilməsinin qarşısının alınmasına görə Daxili İşlər Nazirliyinə, Dövlət Sərhəd Xidmətinə və digər aidiyyəti qurumlara təşəkkür edib.

Gülnar Nazimqızı