AMB-nin nəzarəti maliyyə qruplarını da əhatə edəcək

Azərbaycan Mərkəzi Bankının (AMB) nəzarət səlahiyyətlərinin ayrı-ayrı maliyyə institutları ilə yanaşı, onların daxil olduğu maliyyə qruplarını da əhatə etməsi nəzərdə tutulur.

Bu, Milli Məclisin İqtisadi siyasət, sənaye və sahibkarlıq komitəsində müzakirəyə çıxarılan “Mərkəzi Bank haqqında” qanuna dəyişiklik layihəsində əksini tapıb.

Layihəyə əsasən, AMB bankların, həyatın yığım sığortası ilə məşğul olan yerli və xarici sığortaçıların, təkrarsığortaçıların, sığorta vasitəçilərinin, investisiya şirkətlərinin, investisiya fondlarının və onların idarəçilərinin daxil olduğu qruplara konsolidasiya edilmiş nəzarət həyata keçirəcək.

Bu, nəzarətin maliyyə qrupuna daxil olan şirkətlərin hər biri üzrə ayrıca deyil, bütövlükdə qrup səviyyəsində aparılmasına imkan verəcək.

Maliyyə institutlarının və qruplarının çirkli pulların yuyulması və terrorçuluğun maliyyələşdirilməsi ilə bağlı risk profilləri dövri qiymətləndiriləcək.

Risk profili maliyyə institutu yenidən təşkil edildikdə, benefisiar mülkiyyətçisi dəyişdikdə, fəaliyyət növləri, müştəri qrupu və ya coğrafi fəaliyyət dairəsi yeniləndikdə təkrar qiymətləndiriləcək.
Əməliyyatların intensivliyi və ya məbləği əvvəlki təqvim ili ilə müqayisədə 40% və daha çox artdıqda da yeni qiymətləndirmə aparılacaq.

AMB nəzarətin dövriliyini və intensivliyini maliyyə institutunun və ya qrupun risk profilinə, daxili qaydalarına və nəzarət mexanizmlərinə əsasən müəyyən edəcək. Ölkə səviyyəsində çirkli pulların yuyulması, terrorçuluğun və kütləvi qırğın silahlarının yayılmasının maliyyələşdirilməsi riskləri də nəzərə alınacaq.

Qanun layihəsi AMB-yə maliyyə institutları və qruplarından yazılı sorğu əsasında sənəd və məlumat tələb etmək hüququ da verir. Tələb edilən məlumatlar Mərkəzi Bankın müəyyən etdiyi müddətdə təqdim olunmalıdır.

Dəyişikliklər Avropa Şurasının MONEYVAL komitəsinin Azərbaycan üzrə beşinci qiymətləndirmə hesabatında Maliyyə Tədbirləri üzrə İşçi Qrupun (FATF) maliyyə institutlarına nəzarətlə bağlı 26-cı və nəzarət orqanlarının səlahiyyətlərinə dair 27-ci tövsiyələri əsasında hazırlanıb.

Gülnar Nazimqızı