Bayramov dövlət satınalmalarında süni intellektdən istifadəni təklif edib

Azərbaycanda dövlət satınalmalarının şəffaflığını və səmərəliliyini artırmaq üçün tenderlərin qiymətləndirilməsində süni intellektdən daha geniş istifadə olunmalıdır. Bunu deputat Vüqar Bayramov bildirib.

“Dövlət satınalmalarında şəffaflıq önəmlidir, amma səmərəlilik də vacibdir. Satınalma daha şəffaf olsa da, səmərəli deyilsə, onun iqtisadi effekti yüksək olmur”,- Bayramov Milli Məclisdə çıxışı zamanı deyib.

O bildirib ki, yeni “Dövlət satınalmaları haqqında” qanun qüvvəyə mindikdən sonra qanun pozuntularının sayı azalsa da, Hesablama Palatası 2025-ci ildə də belə hallar qeydə alıb.
Bayramovun sözlərinə görə, Hesablama Palatasının rəyində dövlət satınalmalarının 51%-dən çoxunda ehtimal olunan qiymətlə şirkətlərin təklif etdiyi qiymət arasındakı fərqin 20%-i ötdüyü göstərilib.

“Bu fərq qanunvericilik və səmərəlilik baxımından kifayət qədər ciddidir”, - deputat deyib.

Qiymətlər arasındakı fərq özlüyündə pozuntu demək deyil və təklifin ehtimal olunan qiymətdən aşağı olması büdcə vəsaitinə qənaət də yarada bilər.

Bayramov isə süni intellektdən istifadənin belə kənarlaşmaların səbəblərini daha sürətli müəyyən etməyə imkan verəcəyini bildirib.

“Dövlət satınalmalarında və tenderlərdə süni intellektdən istifadə zəruridir. Bu, qərarların daha qısa müddətdə qəbuluna, qiymət fərqlərinin müəyyənləşdirilməsinə və birbaşa müdaxilələrin məhdudlaşdırılmasına imkan verəcək”, - o deyib.

Bayramov bildirib ki, İqtisadi Əməkdaşlıq və İnkişaf Təşkilatına (OECD) üzv ölkələrin əksəriyyətində dövlət satınalmalarında süni intellektdən müxtəlif formalarda istifadə olunur, İtaliyada isə süni intellekt və blokçeyn texnologiyalarına dair ayrıca qanunvericilik qəbul edilib.

Onun sözlərinə görə, Azərbaycanda dövlət satınalmalarının Rəqəmsal Dövlət Maliyyə İnformasiya Sisteminə inteqrasiyası süni intellekt alətlərinin tətbiqi üçün texniki baza yaradır.

“Bu, həm daha şəffaf, həm də daha səmərəli qərarların qəbuluna imkan verəcək”, - Bayramov bildirib.

Gülnar Nazimqızı