İrlandiya "Avroviziya-2027"də iştirak etməyəcək

İrlandiya İsrailin iştirakı səbəbindən 2027-ci ildə keçiriləcək “Avroviziya” mahnı müsabiqəsində iştirak etməyəcək və yarışmanı yayımlamayacaq.Bu barədə İrlandiyanın ictimai yayım şirkəti “Raidió Teilifís Éireann” (RTÉ) məlumat yayıb.

RTÉ bəyan edib ki, Qəzza zolağında davam edən humanitar böhran və mülki əhali arasında itkilər səbəbindən İrlandiyanın müsabiqədə iştirakını əsaslandırmaq mümkün deyil. Şirkət, həmçinin beynəlxalq jurnalistlərin Qəzza zolağına müstəqil girişinə qoyulan məhdudiyyətlərdən narahatlığını bildirib.

“Avroviziya”nın direktoru Martin Qrin RTÉ-nin qərarından təəssüfləndiyini, lakin bu mövqeyə hörmətlə yanaşdığını deyib. O, Avropa Yayım İttifaqının (EBU) RTÉ ilə dialoqu davam etdirəcəyini və İrlandiyanın gələcəkdə müsabiqəyə qayıdacağına ümid etdiyini bildirib.

İrlandiya 2026-cı ildə də İsrailin iştirakı səbəbindən “Avroviziya”nı boykot edən ölkələr sırasında yer alıb. Həmin il İrlandiya ilə yanaşı, Niderland, İspaniya, İslandiya və Sloveniya da müsabiqədə iştirak etməyib. Niderland 2027-ci il müsabiqəsindən də imtina etdiyini açıqlayıb.

“Avroviziya-2027” may ayında Bolqarıstanın Burqas şəhərində keçiriləcək.