Bu subsidiyalar ən azı 4-5 dəfə artırılmalıdır

Azərbaycanda heyvandarlıq üzrə nəzərdə tutulan subsidiya məbləği kiçik təsərrüfatların inkişafını stimullaşdırmaq üçün ən azı dörd-beş dəfə artırılmalıdır. Bunu Milli Məclisin deputatı Razi Nurullayev bildirib.

Onun sözlərinə görə, 100 hektar torpağı və 500 baş qoyunu olan təsərrüfat üçün mövcud dəstək məbləği ciddi stimul yaratmır.
“Bu, böyük sahibkar üçün stimul deyil. Həmin vəsaitlə o nə təsərrüfatını genişləndirmək, nə də yeni sərmayə qoymaq istəyəcək”, - Nurullayev parlamentdə deyib.

Deputat hesab edir ki, subsidiya siyasəti bir neçə baş heyvan saxlayan kənd sakinlərinin təsərrüfatlarını genişləndirməsinə yönəldilməlidir.
“Beş və ya 10 qoyunu olan kiçik sahibkar bir-iki il ərzində heyvanlarının sayını artıra bilər. Amma onun üçün də dörd manat böyük məbləğ deyil və bu vəsaitin ən azı dörd-beş dəfə artırılmasına ehtiyac var”, - Nurullayev bildirib.

Gülnar Nazimqızı