Kuba yenidən işıqsız qalıb

Kubada elektrik enerjisi sistemi tamamilə çöküb və ölkə üzrə elektrik enerjisinin verilişi dayandırılıb.Bu barədə Kubanın Energetika və Mədən Sənayesi Nazirliyi “X” sosial şəbəkəsində məlumat yayıb.

“Elektrik enerjisi sistemi tamamilə çöküb. Hazırda bərpa protokollarının işə salınmasına başlanılır”, – nazirliyin açıqlamasında bildirilib.

Nazirlik daha sonra qazla işləyən üç generator qurğusunun elektrik enerjisi sisteminə qoşulduğunu açıqlayıb.

“Milli elektrik enerjisi sisteminin bərpası prosesi davam edir”, – məlumatda qeyd olunub.

Kuba Elektrikçilər Həmkarlar İttifaqı isə “Facebook”da yaydığı açıqlamada nasazlığın Matansas–Syenfueqos istiqamətindəki 220 kilovoltluq elektrik verilişi xəttinin sıradan çıxması nəticəsində baş verdiyini bildirib. İttifaqın məlumatına görə, həmin ərazidə hava şəraiti qeyri-sabit olub.

Kubada bundan əvvəl elektrik enerjisinin tamamilə kəsilməsi avqustun 3-də baş verib.

Yerli “CiberCuba” portalının hesablamalarına görə, sonuncu hadisə 2026-cı ilin əvvəlindən ölkənin enerji sistemində baş verən səkkizinci tammiqyaslı çökmədir. Onlardan ikisi martda, üçü iyulda, ikisi isə avqustda qeydə alınıb.