“AZEMBA” proqramı Azərbaycanın transformasiya ehtiyaclarına uyğun hazırlanıb - “IE Business School

”

“AZEMBA” proqramı Azərbaycanın transformasiya, liderlik və insan kapitalının inkişafı ilə bağlı ehtiyacları nəzərə alınmaqla hazırlanıb.

Bunu “IE University”nin tərkibində “IE Business School”un vitse-dekanı Lusiya Eqia (Lusía Egea) ADA Universitetində “AZEMBA” proqramının açılışında deyib.

O bildirib ki, proqram “IE”, “PAŞA Holding” və SOCAR arasında liderlik, transformasiya və gələcəkdə təşkilatların ehtiyac duyacağı bacarıqlarla bağlı müzakirələrin nəticəsidir.

“Transformasiya məqamlarında liderlik xüsusilə böyük əhəmiyyət kəsb edir. Çünki transformasiya sadəcə texnologiya ilə bağlı deyil, o, təşkilatlarla bağlıdır”, - deyə L.Eqia bildirib.

Onun sözlərinə görə, süni intellektin təşkilatlara təsiri, strateji qərarların qəbulu, geosiyasi qeyri-müəyyənliyin idarə olunması və dayanıqlı biznes modellərinin qurulması müasir liderlərin qarşısında duran əsas məsələlərdəndir.

Vitse-dekan qeyd edib ki, proqram iştirakçıları biznes problemlərinə maliyyə, əməliyyatlar və rəqəmsallaşma kimi müxtəlif perspektivlərdən yanaşmağı və onları inteqrasiya etməyi öyrənəcəklər.

Eqia bildirib ki, proqram “IE Business School”un “Global MBA” proqramı əsasında hazırlanıb, lakin Azərbaycan biznes mühitinin ehtiyaclarına uyğunlaşdırılıb.

“Bu proqram “Global MBA” proqramımızın akademik bünövrəsini qoruyub saxlayır, eyni zamanda xüsusi olaraq sizin üçün hazırlanmış komponentləri özündə birləşdirir”, - deyə o vurğulayıb.

O əlavə edib ki, “AZEMBA” çərçivəsində Bakıda dörd, Madriddə isə bir modul təşkil olunacaq.

Aytac