Həsən Həsənov: Albaniyanın eramızdan əvvəl IV əsrdə yaranmasını təsdiqləyən mənbə yoxdur

Tarix elmləri doktoru Həsən Həsənov Qafqaz Albaniyasının dövlət kimi eramızdan əvvəl IV əsrdə yarandığını təsdiqləyən qədim mənbənin olmadığını, Albaniya çarlığına dair məlumatın ilk dəfə eramızdan əvvəl I əsrə aid Roma mənbəsində yer aldığını bildirib.

“Eramızdan əvvəl IV əsrdə Albaniyanın dövlət olaraq yaranmasına dair bir dənə də olsun mənbə yoxdur”, - Həsənov “Qafqaz Albaniyasının irsinə tarixi baxış” mövzusunda seminarda çıxışı zamanı deyib.

Onun sözlərinə görə, Albaniya çarlığına dair məlumata eramızdan əvvəl I əsrdə Roma tarixçisi Dion Kassinin əsərində rast gəlinir.

“Dion Kassi yazır ki, Roma sərkərdəsi Pompey Albaniyaya gələndə albanlar onun qarşısına çarın başçılığı ilə qoşun çıxarıblar”, - Həsənov bildirib.

O, həmçinin Atropatena dövlətinin eramızdan əvvəl IV əsrdə deyil, VII əsrdə yarandığını deyib.

Həsənov tarixi hadisələrin qiymətləndirilməsi zamanı ilkin mənbələrlə sonrakı elmi tədqiqatların fərqləndirilməli olduğunu vurğulayıb.

“Elmdə iki ifadə var: mənbə və tədqiqat. Mənbə hadisədən xəbərdar olan qədim yazılardır. Tədqiqat isə müasir tədqiqatçıların gəldiyi nəticədir. Bunlar tamamilə fərqli məsələlərdir”, - o bildirib.

Həsənovun sözlərinə görə, tarixi iddianın etibarlılığını qiymətləndirərkən onun ilkin mənbəyə, yoxsa yalnız müasir tədqiqatçıların mövqeyinə əsaslandığı müəyyən edilməlidir.

Gülnar Nazimqızı