İlham Əliyev və Ramzan Kadırov "Bakı Ağ Şəhər"də olublar

Azərbaycan Prezidenti İlham Əliyev və Rusiya Federasiyasının Çeçenistan Respublikasının başçısı Ramzan Kadırov oktyabrın 10-da “Bakı Ağ Şəhər”də olublar.Bu barədə Prezidentin Mətbuat Xidməti məlumat yayıb.

“Bakı Ağ Şəhər” layihəsinin icraçı direktoru Ruslan Sadıxov Ramzan Kadırova ərazidə görülən işlər və yaradılmış şərait barədə məlumat verib.

Bildirilib ki, 150 ildən çox müddətdə neft sənayesi tullantıları ilə çirklənmiş və vaxtilə “Qara şəhər” adlandırılan ərazidə Prezident İlham Əliyevin təşəbbüsü ilə genişmiqyaslı ekoloji layihə həyata keçirilib və müasir yaşayış massivi yaradılıb.

“Bakı Ağ Şəhər” layihəsinin icrasına 2011-ci il dekabrın 24-də Prezident İlham Əliyev və birinci xanım Mehriban Əliyevanın iştirakı ilə başlanılıb.

Layihə ekoloji təmizlik, dayanıqlı inkişaf və “ağıllı şəhər” prinsipləri əsasında hazırlanıb. Ərazidə geniş küçələr, yaşıllıq sahələri və beynəlxalq heykəltaraşlıq nümunələri yaradılıb, müasir şəhərsalma həlləri tətbiq olunub.