Azərbaycanda müəssisələr ətraf mühitə təsirlərinə dair illik hesabat təqdim edə bilər

Ətraf mühitə təsiri olan istehsal müəssisələrinin öz fəaliyyətləri üzrə monitorinq aparmasını və nəticələri dövlətə təqdim etməsini nəzərdə tutan qanun layihəsi hazırlanıb. Bunu deputat Sadiq Qurbanov bildirib.

“Qanun layihəsinə əsasən, monitorinqin nəticələri üzrə illik hesabat hazırlanmalı, növbəti ilin fevral ayının 1-nədək aidiyyəti orqana təqdim edilməlidir”, - Qurbanov deyib.

Deputatın sözlərinə görə, müəssisələr monitorinqi özləri aparacaq, dövlət isə istifadə olunan ölçmə cihazlarının tələblərə uyğunluğuna nəzarət edəcək. Layihədə ölçmə vasitələrinin tipinin təsdiqi və yoxlanılması ilə bağlı tələblər də müəyyənləşdiriləcək.

“Hesabatın təqdim olunması kifayət eləməyəcək”, - Qurbanov bildirib.

Onun sözlərinə görə, hesabatdakı məlumatların hansı ölçmə vasitələri ilə əldə edildiyi də göstəriləcək.

Qurbanov deyib ki, layihənin məqsədlərindən biri təbii resursların idarə edilməsində şəffaflığı və hesabatlılığı artırmaqdır. O, ətraf mühitə təsirin qiymətləndirilməsi sənədinin gələcək ekoloji monitorinq üçün başlanğıc nöqtəsi olacağını bildirib

Gülnar Nazimqızı