Azərbaycanda narkotik və digər psixoaktiv maddələrdən asılılıq diaqnozları 43% azalıb

Azərbaycanda ilk dəfə narkotik və digər psixoaktiv maddələrdən asılılıq diaqnozu qoyulanların göstəricisi 2025-ci ildə hər 100 min nəfərə 34 nəfər təşkil edib və əvvəlki illə müqayisədə 43% azalıb. Bu barədə Dövlət Statstika Komitəsindən bildirilib. 

Narkomaniya və zəhərli maddələrdən asılılıq üzrə bu göstərici 2024-cü ildə hər 100 min nəfərə 59,4 nəfər olub.

İlk dəfə alkoqolizm və alkoqol psixozu diaqnozu qoyulanların göstəricisi də 2024-cü ildəki 5,8 nəfərdən 2025-ci ildə 4,3 nəfərə düşərək 26% azalıb.

Narkotik və digər psixoaktiv maddələrdən asılılıq üzrə yeni diaqnozların göstəricisi son illərdə kəskin dəyişib. Hər 100 min nəfərə düşən göstərici 2020-ci ildə 28,4, 2021-ci ildə 59,4, 2022-ci ildə 42,4, 2023-cü ildə 41,4, 2024-cü ildə isə 59,4 nəfər təşkil edib.

2025-ci ilin göstəricisi 2010-cu ildə qeydə alınmış hər 100 min nəfərə 26,3 nəfərlə müqayisədə 29% yüksəkdir.

Alkoqolizm və alkoqol psixozu üzrə yeni diaqnozların göstəricisi isə 2010-cu ildəki 6,1 nəfərlə müqayisədə 2025-ci ildə təxminən 30% azalıb.

Gülnar Nazimqızı