Vəkillərin üzləşdiyi məsələlərlə bağlı dövlət qurumları ilə dialoq davam etdirilir

Azərbaycanda vəkillərin peşə fəaliyyəti zamanı üzləşdikləri məsələlərin həlli üçün aidiyyəti dövlət qurumları ilə institusional dialoq davam etdirilir. Bunu Azərbaycan Vəkillər Kollegiyasının sədri Anar Bağırov Polşada keçirilən beynəlxalq konfransda çıxışı zamanı bildirib.

Bağırovun sözlərinə görə, beynəlxalq təcrübənin və peşəkar standartların öyrənilməsi milli qanunvericiliyin və vəkilliyin institusional mexanizmlərinin təkmilləşdirilməsinə töhfə verir.

“Vəkillər peşə fəaliyyətlərini hər hansı təzyiq və müdaxilədən azad şəkildə, yalnız qanunun və peşə etikası normalarının tələblərinə uyğun həyata keçirməlidirlər”, - Bağırov deyib.

O qeyd edib ki, vəkillik peşəsinin müstəqilliyi hüququn aliliyinin, insan hüquqlarının və ədalətli məhkəmə araşdırmasının əsas təminatlarından biridir. Bu müstəqilliyin qorunmasında qanunvericilik təminatları, peşə özünüidarəetməsi və maliyyə müstəqilliyi mühüm rol oynayır.

Bağırov “Vəkillik peşəsinin müstəqilliyinin təminatları” mövzusunda çıxışını Polşa Milli Vəkillər Şurasının AEA-EAL-a üzvlüyünün 30 illiyi və Avropa Vəkillər Assosiasiyasının yaradılmasının 40 illiyi münasibətilə keçirilən konfransda edib.

Gülnar Nazimqızı