Rusiyada 11 il əvvəl qadını öldürən iki Azərbaycan vətəndaşına hökm oxunub

Rusiyada 2013-cü ildə gənc qadını zorlayaraq öldürməkdə təqsirli bilinən iki Azərbaycan vətəndaşı Bakı Ağır Cinayətlər Məhkəməsinin hökmü ilə 13 və 14 il müddətinə azadlıqdan məhrum edilib.

Hakim Eldar İsmayılovun sədrliyi ilə keçirilən prosesdə 1983-cü il təvəllüdlü S.M.-ə 13 il, 1984-cü il təvəllüdlü E.X.-ə isə 14 il həbs cəzası verilib. Hər iki şəxs cəzasını ciddi rejimli cəzaçəkmə müəssisəsində çəkəcək.

Cinayət 2013-cü il iyunun 25-də Rusiyanın Tatarıstan Respublikasının Bavlı şəhərində baş verib.

Tikintidə çalışan təqsirləndirilən şəxslər 1993-cü il təvəllüdlü Rusiya vətəndaşını qaldıqları binaya dəvət edərək zorlayıb, daha sonra cinayəti gizlətmək məqsədilə öldürüblər.

Qadının meyiti binanın həyətində basdırılıb, hadisədən sonra isə təqsirləndirilən şəxslər Rusiyanı tərk edərək Azərbaycana gəliblər. Rusiya hüquq-mühafizə orqanları qadının itkin düşməsi ilə bağlı araşdırma aparsa da, həmin dövrdə meyiti və şübhəliləri müəyyənləşdirə bilməyib.

İş 2024-cü ilin noyabrında Azərbaycanın Baş Mütəşəkkil Cinayətkarlıqla Mübarizə İdarəsinin keçirdiyi əməliyyatdan sonra yenidən açılıb. Saxlanılan şəxslərin verdiyi məlumatlar əsasında meyitin basdırıldığı yer müəyyən edilib.

Azərbaycan tərəfinin məlumatı ilə Rusiya İstintaq Komitəsinin əməkdaşları Bavlı şəhərindəki köhnə tikilinin həyətində qazıntı apararaq skeletləşmiş meyit və geyim qalıqları aşkarlayıblar.

Kriminalistik ekspertizalar və DNT analizləri qalıqların şəxsiyyətinin müəyyənləşdirilməsinə və cinayətin sübuta yetirilməsinə imkan verib.

Məhkəmədə təqsirləndirilən şəxslərdən biri ittihamı qismən qəbul edib. Digəri isə ibtidai istintaq zamanı təzyiqə məruz qaldığını və cinayətdə iştirak etmədiyini bildirib. Məhkəmə iş üzrə toplanmış sübutlara əsaslanaraq hər iki şəxsi qabaqcadan əlbir olan qrup halında zorlama və cinayəti gizlətmək məqsədilə qəsdən adam öldürməkdə təqsirli bilib.

Tatyana