ABŞ və İran rəsmiləri müharibəyə son qoymaq üçün vasitəçilərlə ayrı-ayrılıqda danışıqlar aparıb

ABŞ və İran rəsmiləri bazar ertəsi günü vasitəçilərlə ayrı-ayrılıqda danışıqlar aparıblar. Reuters-ə danışan mənbələrə görə, danışıqlar yeddi aydır davam edən müharibəyə son qoyulması istiqamətində diplomatik səylərin yenidən canlandırılması çərçivəsində keçirilib.

Danışıqlarla tanış olan bir rəsminin Reuters-ə bildirdiyinə görə, növbəti müzakirələrin İranın ötən həftə BMT Baş Assambleyasının sessiyası çərçivəsində təqdim etdiyi yeddi günlük təklifin dəyişdirilmiş variantı ətrafında aparılması gözlənilir.

İranın dövlət xəbər agentliyi IRNA-nın məlumatına görə, BMT Baş Assambleyasının iclaslarından sonra Nyu-Yorkda qalan xarici işlər naziri Abbas Əraqçi Tehranın Hörmüz boğazında atəşkəsin əldə olunması və dəniz nəqliyyatının bərpası ilə bağlı təkliflərinə ABŞ-dan cavab gözlədiyini bildirib.

Əraqçi deyib: “Əgər amerikalılar razılaşma və ya dinc həll yolu axtardıqlarını iddia edirlərsə, deməli, biz həmin həlli təqdim etmişik”.

ABŞ Prezidenti Donald Tramp isə Ağ Evdə jurnalistlərə ABŞ rəsmilərinin bazar ertəsi vasitəçilərlə ayrıca danışıqlar apardığını təsdiqləyib. O, danışıqların detalları barədə məlumat verməyib.

İranın yeddi günlük təklifinə əsasən, ABŞ hərbi təzyiqi azaltmalı, İran limanlarına tətbiq etdiyi blokadanı aradan qaldırmalı, İranın dondurulmuş aktivlərinin açılmasına və neft satışına imkan verməlidir. Bunun qarşılığında Tehran yeddi gün ərzində Hörmüz boğazını açmağa və nüvə proqramı üzrə danışıqları bərpa etməyə hazır olduğunu bildirib.

Tramp isə İranın təklifini rədd etdiyini bildirib. Buna baxmayaraq, tərəflər arasında vasitəçilər üzərindən yeni təmasların davam etdiyi bildirilir.

Hörmüz boğazı qlobal enerji daşımaları üçün əsas marşrutlardan biridir. ABŞ-İran qarşıdurması fonunda boğazdan keçən neft tədarükü ilə bağlı narahatlıqlar son günlər dünya bazarlarında neft qiymətlərinin artmasına təsir edib.

Gülnar Nazimqızı