İlham Əliyev FIFA prezidenti Canni İnfantinonu qəbul edib

Azərbaycan Prezidenti İlham Əliyev sentyabrın 29-da FIFA prezidenti Canni İnfantinonu qəbul edib.

Görüşdə Azərbaycanda futbolun inkişafı, qarşıdakı beynəlxalq turnirlərə hazırlıq və Azərbaycan-FIFA əməkdaşlığının perspektivləri müzakirə olunub.

İlham Əliyev dünyada, o cümlədən Azərbaycanda futbolun dövlət səviyyəsində inkişafı ilə bağlı görülən işlərə verdiyi dəstəyə görə İnfantinoya təşəkkür edib.

Prezident gələn ay Azərbaycanda ilk dəfə keçiriləcək 15 yaşadək oğlan futbolçular arasında FIFA U-15 Dünya Çempionatı və Festivalına, həmçinin 2027-ci ildə təşkil olunacaq 20 yaşadək futbolçular arasında FIFA U-20 Dünya Çempionatına hazırlıq işlərinin yüksək səviyyədə aparıldığını bildirib.

Dövlət başçısı Azərbaycanın bu idman tədbirlərində iştirakının əhəmiyyətini vurğulayıb və onların ümumilikdə regionda futbolun inkişafına töhfə verəcəyinə ümidvar olduğunu deyib.

Canni İnfantino qəbul üçün təşəkkür edib. O, Azərbaycanda ilk dəfə keçiriləcək U-15 dünya çempionatı və festivalının əhəmiyyətini qeyd edərək, dünya idman ictimaiyyətinin diqqətinin bu tədbirə yönələcəyini bildirib.

Görüşdə Azərbaycanda futbolun inkişafı istiqamətində görülən işlər və son dövrlərdə əldə olunan nəticələr də müzakirə edilib.

Tərəflər Azərbaycanla FIFA arasında qurulmuş əməkdaşlığın uğurlu olduğunu vurğulayıb və tərəfdaşlığın gələcək perspektivləri barədə fikir mübadiləsi aparıblar. Azərbaycan Futbol Federasiyaları Assosiasiyasının (AFFA) FIFA-nın fəaliyyətinə verdiyi dəstək də qeyd olunub.

Görüşün sonunda Canni İnfantino Prezident İlham Əliyevə xatirə hədiyyələri təqdim edib.

 Azərbaycan 2025-ci ildə UEFA U-17 Avropa çempionatına ev sahibliyi edib. Qarşıdakı illərdə ölkədə FIFA-nın təşkilatçılığı ilə U-15 və U-20 dünya çempionatlarının keçirilməsi Azərbaycanın beynəlxalq futbol turnirlərinə ev sahibliyi təcrübəsinin genişləndirilməsi baxımından növbəti mərhələ olacaq.