Danimarka səfiri Rusiya XİN-ə çağırılıb

Rusiya Xarici İşlər Nazirliyi Baltik dənizində Rusiya və Danimarka hərbi qüvvələri arasında baş verən insidentlə bağlı Danimarkanın Moskvadakı səfiri Rolf Holmboeni çağıraraq etirazını bildirib.Bu barədə Rusiya XİN məlumat yayıb.

Rusiya tərəfi Danimarka Hərbi Hava Qüvvələrinə məxsus “Fennec” tipli helikopterin Baltik Donanmasının “Soobrazitelny” korvetinə qarşı “təhlükəli” və “təxribatçı” hesab etdiyi manevrlərə etiraz edib.

İnsident sentyabrın 14-də baş verib. Danimarka tərəfinin məlumatına görə, həmin vaxt Rusiya hərbi gəmisi beynəlxalq sularda hərbi gəmini fotoşəkil çəkən Danimarka helikopterinin istiqamətinə iki siqnal raketi atıb. Raketlərdən biri helikopterin yaxınlığından keçib.

Moskva isə hadisədən sonra helikopterin Rusiya gəmisinin yaxınlığında “təhlükəli manevrlər” etdiyini bildirib və insidenti araşdırdığını açıqlayıb.

Hadisədən sonra Danimarka da Rusiyanın Kopenhagendəki səfirini çağıraraq etirazını bildirib. Rusiyanın səfirinin çağırılması ilə bağlı son qərar isə insidentə cavab xarakteri daşıyıb.