AQTA Kürdəmirdə zəhərlənmə baş verən restoranın fəaliyyətini məhdudlaşdırıb

Kürdəmir rayonunda toy mərasimində baş verən kütləvi zəhərlənmə ilə bağlı araşdırma aparılır və hadisənin baş verdiyi “Günəş” restoranının fəaliyyəti araşdırma yekunlaşanadək məhdudlaşdırılıb.Bu barədə Azərbaycan Qida Təhlükəsizliyi Agentliyindən (AQTA)  məlumat verilib.

Bildirilib ki, toy mərasimində istifadə olunan qida məhsulları məclis sahibi tərəfindən restorana təqdim edilib.Araşdırma çərçivəsində istehlaka təqdim olunan qida məhsullarından, qida ilə təmasda olan işçilərin əllərindən, həmçinin mətbəxdəki səthlər, alət və avadanlıqlardan yaxma nümunələri götürülərək laboratoriyaya göndərilib.

Sentyabrın 30-da keçirilən toy mərasimindən sonra zəhərlənmə şübhəsi ilə 91 nəfər Kürdəmir Rayon Mərkəzi Xəstəxanasına hospitalizasiya olunub. Onlara tibbi yardım göstərilib və vəziyyətləri qənaətbəxş qiymətləndirilən şəxslər ambulator müalicə üçün evə buraxılıb.

Hadisə ilə bağlı Kürdəmir rayon prokurorluğunda da araşdırma aparılır.