"Birliyin Gücü – 2026" birgə hərbi təlimi başa çatıb

Azərbaycan, Türkiyə və Özbəkistanın hərbi qulluqçularının iştirakı ilə keçirilən “Birliyin Gücü – 2026” birgə hərbi təlimi başa çatıb.Bu barədə Müdafiə Nazirliyindən məlumat verilib.

Təlim Qarabağ iqtisadi rayonundakı “Qızılqaya”, Naxçıvan Muxtar Respublikasındakı “Qarabağlar” təlim mərkəzlərində və Xəzər dənizinin Azərbaycanın ərazi sularında yerləşən “Böyük Zirə” təlim rayonunda keçirilib.

Təlim sentyabrın 21-dən oktyabrın 1-dək davam edib. Onun məqsədi iştirakçı ölkələrin orduları arasında əməkdaşlığın genişləndirilməsi, hərbi qulluqçuların praktiki vərdişlərinin təkmilləşdirilməsi, təcrübə mübadiləsi və əlaqələrin gücləndirilməsi olub.

Təlim çərçivəsində müxtəlif döyüş ssenariləri üzrə praktiki və taktiki tapşırıqlar icra edilib. Hərbi qulluqçular yaşayış məntəqələrində döyüş, mina sahələrindən keçidlərin açılması, şərti terrorçuların mövqelərinə basqın, obyektlərin ələ keçirilməsi və zirehli texnikanın məhv edilməsi üzrə fəaliyyətlər həyata keçiriblər.

Dənizdə isə PUA hücumunun qarşısının alınması, ələ keçirilmiş gəmi və dəniz obyektinin, eləcə də girovların azad edilməsi və adaya desant çıxarılması üzrə tapşırıqlar yerinə yetirilib.

Təlimin başa çatması münasibətilə keçirilən mərasimdə Azərbaycan, Türkiyə və Özbəkistanın dövlət himnləri səsləndirilib.

Mərasimdə çıxış edənlər təlimin hərbi qulluqçular arasında təcrübə mübadiləsinə, döyüş hazırlığının artırılmasına və əlaqələrin inkişafına töhfə verdiyini bildiriblər.

Sonda təlim zamanı fərqlənən hərbi qulluqçulara hədiyyələr təqdim olunub və iştirakçıların təntənəli keçidi keçirilib.