Metyu Brayza: ABŞ enerji layihələrində milli maraqları əsas götürüb

ABŞ enerji layihələrinə dəstək verərkən əsas diqqəti qlobal enerji bazarlarının ehtiyaclarına və milli maraqlarının təmin olunmasına yönəldib. Bunu ABŞ-nin Azərbaycandakı keçmiş səfiri, “Jamestown Foundation”ın Direktorlar Şurasının üzvü Metyu Brayza Bakıda keçirilən “CAMCA 2026” Regional Forumunda deyib.

O bildirib ki, Vaşinqtonun bu layihələrdə iştirakı karbohidrogen ehtiyatlarına çıxış əldə etmək və ya onlara nəzarəti ələ keçirmək məqsədi daşımayıb.

“ABŞ bu layihələrdə karbohidrogenlərə çıxış əldə etmək və ya onlara nəzarət etmək məqsədilə iştirak etməyib. Bu, ABŞ-nin milli maraqlarının maksimum dərəcədə təmin edilməsi baxımından nəzərdən keçirilirdi”, - deyə diplomat qeyd edib.

Brayza enerji resurslarının beynəlxalq bazarlara çatdırılmasında marşrutların şaxələndirilməsinin vacibliyini vurğulayıb. Onun sözlərinə görə, enerji təchizatının ayrı-ayrı coğrafi “dar boğazlardan” asılı vəziyyətə düşməsinin qarşısı alınmalıdır.

Keçmiş səfir qeyd edib ki, ABŞ istehsalçı ölkələrin enerji ehtiyatlarını dünya bazarlarına çıxarmasına şərait yaratmağa çalışıb.

O, həmçinin xarici iqtisadi siyasətin həyata keçirilməsi zamanı ABŞ dövlət qurumları arasında səmərəli koordinasiyanın əhəmiyyətini diqqətə çatdırıb.

Aytac