Orxan Mustafayev: CAMCA regionu vahid biznes ekosistemi kimi nəzərdən keçirilməlidir

CAMCA regionu ayrı-ayrı ölkələr kimi deyil, vahid ekosistem kimi nəzərdən keçirilməli və biznesin region üzrə genişlənməsi üçün ümumi imkanlar yaradılmalıdır. Bunu “Sabah Investment Group”un təsisçisi və Direktorlar Şurasının sədri Orxan Mustafayev Bakıda keçirilən CAMCA Regional Forumunda deyib.

Onun sözlərinə görə, ölkələr arasında daha sıx inteqrasiya biznesin inkişafına və region üzrə miqyaslanmasına imkan verə bilər.

“Azərbaycan, Gürcüstan, Özbəkistan, Qazaxıstan və digər ölkələrə ayrı-ayrılıqda yanaşmaq əvəzinə, CAMCA-nı vahid ekosistem kimi nəzərdən keçirmək biznesin miqyasını daha asan genişləndirməyə imkan verə bilər”, -  o bildirib.

Mustafayev qeyd edib ki, bunun üçün qayda və tənzimləmələrin sadələşdirilməsi, kapitala çıxışın genişləndirilməsi və investorlar üçün əlverişli hüquqi mexanizmlərin yaradılması vacibdir.

O əlavə edib ki, CAMCA çərçivəsində texnologiyanın bir ölkədə yaradılması, kapitalın digər ölkədə cəlb olunması və istehsalın başqa ölkədə həyata keçirilməsi kimi regional biznes modelləri mümkün ola bilər.

Aytac