Dövlət qeyri-neft məhsullarının ixrac logistika xərclərinin 70%-dək hissəsini qarşılayır - nazir

Azərbaycan dövləti qeyri-neft məhsullarının ixracı ilə bağlı logistika xərclərinin 70%-dək hissəsini qarşılayır. Bunu  kənd təsərrüfatı naziri Məcnun Məmmədov bildirib.

“Əsas yük, əsas öhdəlik özəl sektorun üzərinə düşür”, - Məmmədov deyib.

Onun sözlərinə görə, fermer və şirkətlər müasir, intensiv təsərrüfatçılığa keçməli, məhsulun saxlanmasına, emalına və daşınmasına, eləcə də brend yaradılmasına investisiya qoymalıdırlar.

“İxrac yönümlü məhsulların, qeyri-neft məhsullarının logistika xərclərinin 70%-ə qədər qarşılanması nəzərdə tutulub. Çox ciddi bir dəstəkdir”, - nazir bildirib.

Məmmədov dövlət dəstəyinin investisiya və istehsal mərhələlərini əhatə etdiyini deyib.

Onun sözlərinə görə, məhsul, heyvan və sertifikat subsidiyaları istehsalın beynəlxalq standartlara və ixrac bazarlarının tələblərinə uyğunlaşdırılmasına yönəlib.

“Daha az resursla daha çox məhsul istehsal edən özəl sektor  emalına investisiya edəcək və marka yaradılmasına önəm verəcək”, - o deyib.

Gülnar Nazimqızı