“Xocəsən” və “Avtovağzal” stansiyalarında ödənişsiz xidmətdən 120 mindən çox sərnişin yararlanıb

Bu ilin sentyabr ayında sərnişinlər metro ilə 14 milyondan çox səfər ediblər. Bu barədə "Bakı Metropoliteni" QSC məlumat yayıb

Sentyabrın 23-dən müvəqqəti olaraq ödənişsiz xidmət göstərən “Xocəsən” və “Avtovağzal” stansiyalarından ay sonuna qədər ümumilikdə 120 336 sərnişin istifadə edib.

Ayın lideri 1 474 403 sərnişinlə “28 May” stansiyası olub. 21 sentyabrda 638 613 nəfər olmaqla ayın ən çox sərnişini daşınıb.

Formula 1-in keçirildiyi günlərdə adi günlərlə müqayisədə “İçərişəhər”dən 12 min, “28 May”dan isə 13 min nəfərə yaxın daha çox sərnişin istifadə edib.

Ötən ay NFC və QR bilet vasitəsilə ümumilikdə 7 662 936 ödəniş həyata keçirilib. Bu göstərici ay ərzində metrodan ödənişli istifadə edən sərnişinlərin 54, 42 %-ni təşkil edib və avqust ayı ilə müqayisədə 1 % artıb.

“Əlçatan metro” xidmətindən 112 sərnişin yararlanıb. Bu göstərici avqust ayı ilə müqayisədə 41,77 % artıb.