Ağdam narı ilk dəfə Avropa bazarlarında satışa çıxarılacaq

Ağdamda fəaliyyət göstərən “Zəfər Bağları” MMC Azərbaycan narını yaxın günlərdə Avropa İttifaqının üzvü Bolqarıstana ixrac etməyi planlaşdırır.

Şirkətin icraçı direktoru Seymur Sadıxov jurnalistlərə bildirib ki, ixracla bağlı bəzi müqavilələr artıq imzalanıb. Şirkət Səudiyyə Ərəbistanı, Bolqarıstan və Slovakiya bazarlarına çıxmaq üçün danışıqlar aparır.

Sadıxovun sözlərinə görə, “Zəfər Bağları” indiyədək 420 hektar ərazidə fəaliyyət göstərib. Gələn ildən 300 hektar sahədə yeni nar və badam bağlarının salınması nəzərdə tutulur. Hazırda şirkətdə 150 nəfər çalışır, gələcək illərdə işçi sayının 250-yə çatdırılması planlaşdırılır.

Şirkət fəaliyyətinin ikinci ilindən Rusiya, Ukrayna və Gürcüstan bazarlarına məhsul göndərməyə başlayıb.

Sadıxov bildirib ki, bağlarda məhsuldarlıq ilk il hektara 4 ton, ikinci il 6 ton olub. Bu il göstəricinin hektara 8 tona çatdırılması planlaşdırılır. Şirkət 2032-ci ilədək məhsuldarlığı hektara 20–25 tona yüksəltməyi hədəfləyir. Bunun üçün yeni sortların yetişdirilməsi və müasir suvarma sistemlərinin qurulması nəzərdə tutulur.

Bağlar Ağdam rayonunda “Agro Food İnvestments” şirkəti tərəfindən salınıb.

Gülnar Nazimqızı