Azərbaycan kəndlərində tibb məntəqələri azalır, müraciətlər isə 12% artıb - rəsmi

Azərbaycanda kənd yerlərində fəaliyyət göstərən tibb məntəqələrinin sayı 2025-ci ildə 1 512-yə düşüb, həmin məntəqələrə müraciətlərin sayı isə əvvəlki illə müqayisədə artaraq 1,414 milyona çatıb. Bu barədə Dövlət Statistika Komitəsindən bildirilib. 

2024-cü ildə ölkədə 1 603 kənd tibb məntəqəsi fəaliyyət göstərib və onlara 1,263 milyon müraciət qeydə alınıb.

2025-ci ildə məntəqələrin sayı 5,7% azalıb, müraciətlərin sayı isə 12% artıb.

2023-cü ildə kənd yerlərində 1 602 tibb məntəqəsi fəaliyyət göstərib, müraciətlərin sayı 1,899 milyon olub.

Bu, 2025-ci ilin göstəricisindən təxminən 26% çoxdur. 

Bundan əvvəl Milli Məclisin deputatı Əhliman Əmiraslanov 2026-cı il dövlət büdcəsinə münasibət bildirərkən icbari tibbi sığorta üzrə xidmətlərin genişləndirilməsinə baxmayaraq, vətəndaşların gözləntilərinin tam qarşılanmadığını deyib.

“Ambulator müalicələrin icbari tibbi sığorta çərçivəsində qarşılanması məsələsi hələ də həll olunmayıb. Bu məsələ 2026-cı ildə mütləq həllini tapmalıdır”, - deputat vurğulayıb.

Regionlarda tibbi xidmətlərin vəziyyəti ilə bağlı problemlər daha əvvəl də gündəmə gətirilib. TƏBİB-in keçmiş sədri Vüqar Bayramov regionlarda tibb məntəqələrinin təxminən 80%-nin vəziyyətinin qənaətbəxş olmadığını bildirib.

Gülnar Nazimqızı