Qara dənizdə vurulan gəminin Mübariz Mənsimovun şirkəti tərəfindən işlədildiyi təsdilənib

PALMALI Şirkətlər Qrupu tərəfindən istismar olunan “Royad Mammadov” yük gəmisi oktyabrın 5-də Ukraynanın İzmail limanından İtaliyanın Ravenna limanına hərəkət edərkən Qara dənizdə, Rumıniya sahilləri yaxınlığında dron hücumuna məruz qalıb. Hadisə nəticəsində iki dənizçi həlak olub. Bu barədə şirkətin açıqlamaqsında bildirilib. 

Hücumdan sonra gəmidə yanğın baş verib və heyətin təxliyəsi üçün xilasetmə işlərinə başlanılıb.

Digər heyət üzvlərinin sağ-salamat təxliyə edilərək təhlükəsiz əraziyə çatdırıldığı qeyd olunub.

“PALMALI Şirkətlər Qrupu olaraq həyatını itirən dənizçilərimizin ailələrinin yanındayıq. Ailələrimizə lazımi hər cür dəstək göstərilir və ehtiyaclarının qarşılanması üçün zəruri işlər diqqətlə aparılır”, - açıqlamada bildirilib.

Şirkət hadisə ilə bağlı prosesin aidiyyəti qurumlarla koordinasiya şəraitində yaxından izlənildiyini açıqlayıb.

Azərbaycan Xarici İşlər Nazirliyinin məlumatına görə, hücum nəticəsində gəminin kapitanı, 1974-cü il təvəllüdlü Azərbaycan vətəndaşı Həsənov Rüstəm İsmayıl oğlu həlak olub, digər Azərbaycan vətəndaşı, 2002-ci il təvəllüdlü Süleymanzadə Məhəmməd Həmzə oğlu isə itkin düşüb.

XİN bildirib ki, gəmidə olan digər Azərbaycan vətəndaşları xilas edilib, onlardan üçü xəstəxanaya yerləşdirilib. Nazirlik hazırda itkin düşən şəxsin axtarışının aparıldığını açıqlayıb.

Nazirliyin məlumatına görə, Azərbaycanın diplomatik nümayəndəlikləri və aidiyyəti ölkələrin səlahiyyətli qurumları ilə koordinasiya işləri aparılır. Həlak olan vətəndaşın cənazəsinin Azərbaycana gətirilməsi, xilas edilən şəxslərə tibbi və konsulluq dəstəyinin göstərilməsi istiqamətində tədbirlər görülür.

XİN Azərbaycan vətəndaşlarını hərbi əməliyyatların getdiyi və təhlükəsizlik vəziyyətinin qeyri-sabit olduğu bölgələrə səfər etməkdən, həmçinin bu ərazilərdə və riskli marşrutlarda, xüsusilə gəmilərdə əmək fəaliyyəti ilə məşğul olmaqdan çəkinməyə çağırıb.

Gülnar Nazimqızı