Deputat korrupsiya barədə məlumat verən şəxsin ölümünə görə kompensasiyanın artırılmasını təklif edib

Deputat Qüdrət Həsənquliyev korrupsiya barədə məlumat verən şəxsin öldürülməsi halında onun ailəsinə ödənilən kompensasiyanın 20 min manatdan ən azı 150 min manata qaldırılmasını təklif edib. Həsənquliyev bu təklifi qanun layihəsinin Milli Məclisdə müzakirəsi zamanı səsləndirib.

“Bu rəqəmi minimum 150 min manat məbləğində nəzərdə tutmalıyıq”, - deputat deyib.

O, həmçinin dövlətə qaytarılan vəsaitdən korrupsiya barədə məlumat verən şəxsə ödənilməsi nəzərdə tutulan payın 5%-dən artırılmasını təklif edib.

Deputat ABŞ təcrübəsini nümunə göstərərək bildirib ki, iri korrupsiya cinayətləri barədə məlumat verən və nəticədə dövlətə vəsait qaytarılmasına səbəb olan şəxslərə qaytarılan məbləğin 10-30%-i həcmində mükafat ödənilə bilər.

“Amma bizdə 5 faiz nəzərdə tutulması da hesab edirəm ki, nəzərə alınmalıdır”, - Həsənquliyev bildirib.

Deputat korrupsiya ilə bağlı müraciətlərin müstəqil Korrupsiyaya qarşı mübarizə komissiyasına ünvanlanmasını da təklif edib.

“Şəxsin öz təşkilatının rəhbərinə müraciət etməsində bir məna görmürəm”, - deyə o bildirib.

Həsənquliyevin fikrincə, komissiya əsaslı hesab etdiyi müraciətləri aidiyyəti dövlət qurumlarına göndərməlidir.

O, həmçinin komissiyanın dövlət qurumlarından asılı olmayan şəxslərdən formalaşdırılmasını təklif edib.

Deputat korrupsiya cinayətində iştirak etmiş, daha sonra bu barədə məlumat vermiş şəxslərin müdafiəsi və mükafatlandırılması qaydalarının da qanun layihəsində ayrıca müəyyənləşdirilməsinin vacibliyini vurğulayıb.

Gülnar Nazimqızı